Istilah Pawayangan

Istilah pawayangan nyaeta istilah atawa kekecapan anu aya patalina jeung dunya pawayangan, misalna wae : dalang, jantur, sinden, nayaga, gamelan, kotak, jste. Dalang nyaeta pamingpin rombongan dina wayang atawa jalma tukang ngigelkeun wayang. Jantur nyaeta gebog cau paranti nancebkeun wayang, sinden mah sarua jeung juru kawih, nayaga mah tukang nabeuh gamelan, ari gamelan nyaeta saparangkat tatabeuhan nu lengkep, diwangun ku rebab, gambang, saron, bonang, kendang, jste. Sedengkeun nu disebut kotak dina istilah pawayangan mah tempat nyimpen wayang, beda jeung istilah kotak dina harti sejen.